0

فیکٹری میں آتشزدگی، کروڑوں کا سامان جل گیا

لاہور (مانند نیوز ڈیسک) لاہور کے علاقے سگیاں پل کی قریبی آبادی میں پلاسٹک کا سامان بنانے والی فیکٹری میں لگنے والی آگ پر 9 گھنٹے بعد قابو پالیا گیا۔ تفصیلات کے مطابق لاہور کے علاقے سگیاں پل کی آبادی واٹر لینڈ پارک کے قریب بچوں کے واکرز بنانے والے تین منزلہ کارخانے میں پیر اور منگل کی درمیانی شب آگ لگی، پلاسٹک،کیمیکلز اور گیس سلنڈروں سے آگ اتنی بھڑکی کہ شعلے آسمان سے باتیں کرتے رہے۔فیکٹری میں کام کرنے والے مزدوروں کے مطابق آگ عمارت میں موجود لفٹ کے شارٹ سرکٹ سے لگی۔فیکٹری مالکان نے کہاکہ وہ گلبرگ میں اپنے گھروں میں سوئے ہوئے تھے، مزدوروں کی اطلاع پر ریسکیو کو اطلاع کرکے یہاں پہنچے جب تک فیکٹری میں کروڑوں روپے کا سامان جل کر خاکستر ہو گیا۔ریسکیو ٹیم کے مطابق 2 کنال کی تین منزلہ فیکٹری میں پلاسٹک کا خام مال بڑی مقدار میں تھا، آگ وقفے وقفے سے بھڑکتی رہی اسی لیے بجھانے میں زیادہ وقت لگا۔ریسکیو سٹاف نے 16 فائرٹینڈرز کی مدد سے آگ پر قابو پایا اور خوش قسمتی سے کسی جانی نقصان کی اطلاع نہیں ملی۔

خبر پر آپ کی رائے

اپنا تبصرہ بھیجیں