0

رجسٹرار سپریم اپیلٹ کورٹ گلگت بلتستان کو توہین عدالت کا شوکاز نوٹس جاری

اسلام آباد (مانند نیوز ڈیسک) سپریم کورٹ آف پاکستان نے رجسٹرار سپریم اپیلٹ کورٹ گلگت بلتستان کی جانب سے جواب جمع نہ کروانے پراظہار برہمی کرتے ہوئے رجسٹرار سپریم اپیلٹ کورٹ نیاز محمد کوتوہین عدالت اظہار وجوہ کا نوٹس جاری کردیاہے عدالت نے قراردیا ہے کہ رجسٹرار سپریم اپیلٹ کورٹ نیاز محمد بتائیں انکے خلاف توہین عدالت کی کاروائی کیوں نہ کی جائے؟عدالت نے قراردیاکہ رجسٹرار سپریم اپیلٹ کورٹ نہ خود پیش ہوئے نہ جواب جمع کروایااس لئے دو ہفتوں میں اظہار وجوہ کے نوٹس پر جواب جمع کرائیں۔ جمعرات کو چیف جسٹس آف پاکستان کی سربراہی میں تین رکنی بینچ نے گلگت بلتستان سپریم اپیلٹ کورٹ میں بھرتیوں سے متعلق کیس کی سماعت کی۔کیس کی سماعت کا آغاز ہواتو ملازمین کے وکیل عارف چوہدری نے کہا کہ سپریم کورٹ نے گذشتہ سماعت پر رجسٹرار سے جواب طلب کیا تھا لیکن رجسٹرار سپریم اپیلٹ کورٹ نہ تو پیش ہوئے اور نہ ہی جواب جمع کروایااس پر سینئروکیل حامد خان نے کہاکہ رجسٹرار کورونا میں مبتلا ہو نے کے باعث عدالت میں پیش نہیں ہوئے، گلگت بلتستان سپریم اپیلٹ کورٹ میں نئے رجسٹرار کی تقرری کے باعث جواب جمع نہیں کروایا جا سکا۔چیف جسٹس گلزار احمد نے کہا کہ رجسٹرارکو سپریم کورٹ کے احکامات پر عمل کرنا چاہیے تھا ہم رجسٹرار کو توہین عدالت کا نوٹس جاری کر رہے ہیں، عدالت نے کیس کی مزید سماعت چار ہفتوں کیلئے ملتوی کردی۔

خبر پر آپ کی رائے

اپنا تبصرہ بھیجیں