پشاور،رمضان المبارک سے قبل مہنگائی میں مزید اضافہ

پشاور(مانند نیوز ڈیسک) رمضان المبارک کی آمد سے قبل شہر کے بازاروں میں مہنگائی کی لہر بر قرار ہے۔مختلف اشیاء کی قیمتیں آسمان سے باتیں کرنے لگیں۔ سبزی،پھل،مشروبات اور اشیائے خورد و نوش کی قیمتوں میں ریکارڈ اضافے نے شہریوں کے اوسان خطا کر دیئے تاہم ضلعی انتظامیہ قیمتوں کو کنٹرول کرنے میں بے بس دکھائی دینے لگی۔ رمضان کیلئے خریداری کرنیوالے شہری خالی ہاتھ گھروں کو لوٹنے پر مجبور ہیں۔شہر کے بازاروں میں پھلوں میںسیب 350روپے فی کلو تک پہنچ چکے ہیں۔کیلا 330 روپے فی درجن،امرود 210،انگور 300جبکہ دیگر پھلوں کی قیمتیں بھی آسمان سے باتیں کرنے لگی ہیں۔سبزیوں میں ٹماٹر 80سے 90،کچالو 100 سے 120،سبز مرچ 140،لیموں 220،ادرک 620روپے اور پیاز 120 سے 130روپے فی کلو تک فروخت ہونے لگا اور دیگر سبزیوں کی قیمتیں بھی بے لگام ہیں جبکہ رہی سہی کسر منافع خوروں نے پوری کر دی جو دونوں ہاتھوں سے عوام کو لوٹنے لگے۔اسی طرح کھجور کی قیمتوں میں بھی ایک سال کے دوران سو فیصد اضافہ ریکارڈ کیا گیا۔شہر کے بازاروں میں ایک کلو عجوہ کھجور کی قیمت 15سو سے بڑھ کر 3ہزارہوگئی۔ ایرانی زاہدی ایک کلو کھجور 4 سو سے بڑھ کر 8 سو ہوگئی ہے جبکہ ایرانی سخت کھجور بھی 250 سے بڑھ کر 500 روپے فی کلو تک پہنچ گئی ہے۔ اشیائے خوررد و نوش کی قیمتوں میں بھی اضافہ دیکھنے کو ملا۔ بازاروں میں بیسن 280روپے سے 300روپے تک جبکہ چاول 360سے 400روپے تک فروخت ہونے لگا جبکہ دیگر اشیاء خورد ونوش کی قیمتیں بھی قوت خرید سے باہر ہوچکی ہیں۔