0

سعودی عرب، عمرہ ادائیگی کیلئے چند ممالک کے شہریوں پر ویزا کی شرط ختم

پشاور( مانند نیوز)سعودی عرب کے حکام کی جانب سے چند ممالک کے شہریوں کیلئے بغیر ویزا عمرے کی ادائیگی سے متعلق اعلان کیا گیا ہے۔

اگر آپ یورپی یونین، برطانیہ اور ریاست ہائے متحدہ کے شہری اور مسلمان ہیں اور عمرہ کرنا چاہتے ہیں تو آپ خوش قسمت ہیں کیونکہ سعودی وزارت برائے حج و عمرہ کے اعلان کے مطابق ان ممالک کے شہریوں کو ویزے سے مستثنیٰ قرار دے دیا گیا ہے۔

غیر ملکی میڈیا کے مطابق سعودی وزارت برائے حج و عمرہ نے اعلان کیا ہے کہ اب یورپی یونین (EU)، برطانیہ (UK) اور امریکا (US) کے مستقل رہائشی ویزا کے بغیر عمرہ ادا کر سکیں گے۔

سعودی وزارت حج اور عمرہ کے مطابق ان ممالک کے افراد کے فرسٹ ڈگری رشتے دار بھی اس سہولت سے مستفید ہو سکیں گے۔

سعودی عرب کی نئی پالیسی ان ممالک سے آنے والے سیاحوں پر بھی لاگو ہوگی۔

غیر ملکی میڈیا رپورٹس کے مطابق اس اقدام کا مقصد عمرہ زائرین کے لیے آسانیاں پیدا کرنا، اُن کی بہتر طور پر خدمت اور مغربی ممالک کے مسلمانوں میں ثقافتی اور مذہبی رجحان کو بڑھانا ہے۔

یہ قدم سعودی عرب کے ’ویژن 2030‘ تحت اٹھایا گیا ہے۔

سعودی عرب کی جانب سے جاری کیے گئے نئے قاعد و ضوابط کے تحت عمرہ کے اہل افراد آسانی سے ’نُسُک‘ (Nusk) ایپلیکشن کے ذریعے اپنی عمرہ کی منصوبہ بندی کر سکتے ہیں یا سعودی عرب پہنچنے پر موقع پر ہی انتخاب اور فیصلہ کر سکتے ہیں۔

دوسری جانب اس فیصلے کے تحت سعودی ایئر لائنز کے ذریعے بھی مسافروں کو آسانی دی گئی ہے۔

امریکا، برطانیہ اور یورپین یونین سے سعودی عرب کی جانب سفر کرنے والے ٹرانزٹ ویزا ہولڈرز کے لیے عمرہ کرنے کا اختیار بڑھا دیا گیا ہے جس سے مسلمانوں کے لیے روحانی سفر کرنا مزید آسان ہو گیا ہے۔

واضح رہے کہ سعودی عرب کی حکومت اس وقت رواں سال جون میں ہونے والے آئندہ حج کے انتظامات میں مصروف ہے۔

دوسری جانب سعودی حکام کے مطابق گزشتہ سال سے تاحال مسلم دنیا سے 13.5 ملین سے زائد زائرین نے عمرہ ادا کیا ہے۔

Share and Enjoy !

Shares

اپنا تبصرہ بھیجیں