پشاور (مانند نیوز ڈیسک) آزاد کشمیر انتخابات کے حوالے سے وزیر اعلیٰ خیبر پختونخوا محمود خان نے کہاہے کہ آزاد کشمیر قانون ساز اسمبلی کے انتخابات میں پی ٹی آئی امیدواروں کی شاندار کامیابی وزیر اعظم عمران خان کی پالیسیوں پر عوامی اعتماد کا مظہر ہے۔اپنے ایک بیان میں انہوں نے کہا کہ ان انتخابات میں پی ٹی آئی کی کامیابی پارٹی اور پارٹی قائد عمران خان کی بڑھتی ہوئی عوامی مقبولیت کا ثبوت ہے۔ خیبر پختونخوا سے شروع ہونے والا پی ٹی آئی کی کامیابی کا شاندار سفر پنجاب اور گلگت بلتستان سے ہوتا ہوا اب کشمیر پہنچ گیاہے۔ کپتان کی قیادت میں تبدیلی کا یہ سفر مزید زور و شور سے جاری رہے گااور 2023 کے عام انتخابات میں پورے ملک میں تحریک انصاف کی حکومت ہوگی۔ آزاد کشمیر کے عوام کو تبدیلی کی نئی صبح مبارک ہو۔اب آزاد کشمیر میں بھی ترقی و خوشحالی کے ایک نئے دور کا آغاز ہوجائے گا۔