ویکسین نہ لگانے والوں کے خلاف سخت پابندیاں لگانے کا فیصلہ

پشاور (مانند نیوز ڈیسک) خیبر پختونخواحکومت نے کورونا ویکسین لگوانے کارجحان بڑھانے کیلئے سخت پابندیاں لگانے کا فیصلہ کیا ہے۔صوبائی وزیرصحت تیمورسلیم جھگڑا نے کہا ہے کہ ویکسین نہ لگوانے والوں پرسفری پابندیاں عائد کی جائیں گی جبکہ موبائل سم بھی بلاک ہوسکتی ہے۔ ویکسین نہ لگوانے پرسرکاری ملازمین کی تنخواہیں روکنے پر بھی غورکیا جارہاہے۔پشاورمیں پریس کانفرنس کرتے ہوئے وزیر صحت خیبر پختونخوا تیمور سلیم جھگڑا نے کہا کہ کورونا وائرس کی چوتھی لہرمیں شدت پرمزید سختیاں کرنی پڑیں تو کریں گے۔جعلی  سرٹیفکیٹ بنوانے والوں کے خلاف کارروائی کی جائے گی۔انہوں نے کہا کہ خیبر پختونخوا کی 30 فیصد آبادی نے مکمل ویکسین لگا لی ہے جبکہ گزشتہ روزکے ڈیٹا کے مطابق اب تک 7.3 ملین سے زائد ویکسین لگائی گئی۔ 15لاکھ لوگوں کودوسری ڈوزز دی جاچکی ہے۔ روزانہ 2 لاکھ افراد کو ویکسین لگانے کاٹارگٹ ہے۔انہوں نے بتایاکی اہم ہسپتالوں میں کورونا مریضوں میں صرف 2 فیصد ایسے ہیں جو ویکسین لگوا چکے ہیں اور اسی لیے خطرے سے باہر ہیں۔ صوبے بھر میں 750 سے زیادہ سنٹر بنائے گئے ہیں۔آدھی آبادی کوویکسین لگ گئی تو وائرس کا اثر کم ہوجائے گا۔انہوں نے مزید کہا کہ فرسٹ ڈوزکے حساب سے چترال کی 65 فیصدآبادی کو ویکسین لگائی جا چکی ہے جبکہ چترال کی 40 فیصد آبادی کو دوسری ڈوزبھی لگائی گئی ہے۔ کرم میں 15 فیصد آبادی ویکسین کی دونوں خوراکیں لگواچکی ہے۔انہوں نے مزید بتایاکہ صوبے میں کورونا کی موجودہ شرح 5.2فیصد ہے۔ہسپتالوں میں مریض پچھلی لہر سے صرف 20 فیصد کم ہیں۔