پشاور (مانند نیوز) تفصیلات کے مطابق، معاون خصوصی برائے ریونیو پیر ہارون شاہ نے سول سیکرٹریٹ میں منعقدہ اجلاس سے اپنے خطاب میں کہا کہ نئے بھرتی ہونے والے تحصیلداران اور نائب تحصیلداران کی تعیناتی میرٹ اور قانون کے مطابق کی جائے گی جبکہ کوئی بھی تعیناتی پسند اور ناپسند کی بنیاد پر نہیں کی جائے گی. انہوں نے کہا کہ بورڈ آف ریونیو کی تاریخ میں پہلی مرتبہ تحصیلداران اور نائب تحصیلداران کو مدعو کیا گیا جن سے ان کی نئی تعیناتی کے بارے میں رائے لی گئی. جس کا بنیادی مقصد محکمہ مال کی جانب سے خدمات کی فراہمی میں مزید بہتری لانی ہے. اجلاس میں نئے بھرتی ہونے والے 17 تحصیلداران اور 36 نائب تحصیلداران شریک ہوئے جنہوں نے اپنے تعیناتی کے بارے میں اپنی راۓ کا اظہار کیا. گزشتہ ایک ماہ سے پبلک سروس کمیشن خیبرپختونخوا کے تحت سیلیکٹ ہونے والے تحصیلداران اور نائب تحصیلداران اپنی تعیناتی کے انتظار میں ہیں. اجلاس میں سیکرٹری 1 بورڈ آف ریونیو اور اسسٹنٹ سیکریٹری اسٹبلشمنٹ بورڈ آف ریونیو نے بھی شرکت کی.