چارسدہ (مانند نیوز)ایک سال گزرنے کے باوجود مُنڈاپُل تعمیرنہ ہوسکا۔عوام شدید مشکلات سے دوچار تفصیلات کے مطابق ایک سال پہلے کالام سوات سے آنے والے سیلابی ریلوں کی وجہ سے مُنڈا کا پُل ٹوٹ گیا تھا جس کی وجہ سے شبقدراورتنگی کا رابطہ منقطع ہوگیا تھا۔ یہاں کے مقامی لوگوں کو سخت مشکلات کا سامنا ہے۔ حکومت سے باربار شکایت کرنے کے باوجود بھی یہ مسئلہ حل نہ ہوسکا۔ عوام مجبوراً کشتیوں میں سفرکرنے لگے جو کہ انتہائی خطرناک ہوتا ہے۔ کئی حادثات بھی پیش ہوئیں لیکن مقامی انتظامیہ اورمتعلقہ حکام کے کانوں پر جوں تک نہیں رینگی۔ کشتیوں کے مالکان نے بھی خوب مجبوری سے فائدہ اٹھایا اورلاچار عوام کو دونوں ہاتھوں سے لوٹا۔یہاں کے کچھ مقامی لوگوں نے اپنی مددآپ کے تحت لکڑیوں کا پُل بنایا لیکن وہ بھی جلد ٹوٹ گیا۔یہاں کے عوام خصوصاً بچوں اورعورتوں کو شدید مشکلات کا سامنا ہے۔ پورا ایک سال گزرگیا لیکن یہ پُل ابھی تک وہی کا وہی ہے۔ یادرہے کہ 2010 کے سیلاب میں یہ پُل مکمل ٹوٹ گیا تھا جو پانچ سال میں تعمیر ہوا۔اُن پانچ سالوں میں عوام کو سخت مشکلات تھیں۔ مقامی لوگوں نے صوبائی حکومت سے پرزورمطالبہ کرتے ہوئے کہا کہ پُل کی جلد از جلد تعمیر یقینی بنائی جائے اور ہمیں ان مشکلات سے چھٹکارا دیا جائے۔
