کوہاٹ (مانند نیوز)کوہاٹ کے حلقہ پی کے 91 میں صاف و شفاف اور پرامن ضمنی انتخابات کے انعقاد کے حوالے سے ڈپٹی کمشنر کوہاٹ ڈاکٹر عظمت اللہ وزیر کی زیر صدارت خصوصی اجلاس منعقد ہوا جس میں ضلعی انتظامیہ، کوہاٹ پولیس، صحت، تعلیم، لوکل گورنمنٹ، بلدیات اور دیگر متعلقہ محکموں کے حکام نے شرکت کی۔ اجلاس میں مذکورہ حلقہ میں منعقد ہونے والے ضمنی انتخابات کے سیکیورٹی،حساس پولنگ سٹیشنز میں سی۔سی۔ٹی۔وی کیمروں کی تنصیب اور دیگر انتظامات کے حوالے سے مختلف امور کا تفصیلی جائزہ لیا گیا اور اس سلسلے میں کئی اہم فیصلے کئے گئے۔ ڈپٹی کمشنر نے تمام متعلقہ محکموں کو ہدایت کی کہ وہ ضمنی انتخابات کے صاف و شفاف اور پرامن انعقاد کے حوالے سے اپنی ذمہ داریاں پوری دیانتداری اور تندہی سے ادا کریں اور اس سلسلے میں تمام متعلقہ محکمے اور ادارے باہمی تعاون کا مظاہرہ کریں۔