اسلام آباد (مانند نیوز ڈیسک) وفاقی وزیر داخلہ شیخ رشید احمد نے سانحہ آرمی پبلک سکول اور مشرقی پاکستان کی برسی کے موقع پر جاری اپنے بیان میں کہا ہے کہ آج کے دن سانحہ آرمی پبلک سکول اور مشرقی پاکستان ہماری تاریخ کے ناقابل فراموش واقعات ہیں۔ ان واقعات کے شہیدوں نے پاکستانی قوم کو ملک دشمنوں سے مقابلہ کرنے کا ایک نیا جذبہ دیا۔ان خیالات کااظہار شیخ رشید احمد نے جمعرات کے روز ٹوئٹر پر جاری اپنے بیان میں کیا۔ شیخ رشید احمد کا کہنا تھا کہ آج کے دن پوری قوم اپنے شہدا کو خراج تحسین اور سلام پیش کرتی ہے۔آج کے دن ہم نے عزم نو کرنا ہے کہ ملک دشمنوں کے خلاف پوری قوم متحدہے۔نیشنل ایکشن پلان پرعملدآمد یقینی بنارہے ہیں تاکہ ایسے سانحات دوبارہ وقوع پذیر نہ ہوں۔