اسلام آباد (مانند نیوز ڈیسک) ڈپٹی سپیکر قومی اسمبلی قاسم خان سوری کی جانب سے قومی اسمبلی کا اجلاس تاخیر سے بلانے کا اقدام اسلام آباد ہائی کورٹ میں چیلنج کر دیا گیا۔وکیل منصور اعوان اور زینب جنجوعہ ایڈوکیٹ نے ن لیگ کے مرتضیٰ جاوید عباسی کی جانب سے درخواست اسلام آباد ہائی کورٹ میں دائر کی، درخواست پر جلد سماعت کی استدعا کی گئی۔درخواست میں موقف اپنایا گیا کہ 13 اپریل کا سرکلر جس میں اجلاس 22 اپریل تک ملتوی کیا گیا آئین سے متصادم ہے لہذا ڈپٹی سپیکر کو سپیکر اسمبلی کے الیکشن کے لیے فوری اجلاس بلانے کی ہدایت کی جائے۔درخواستگزار نے استدعا کی کہ سیکریٹری پارلیمانی افیئرز اور سیکریٹری اسمبلی کو 16 اپریل کو اجلاس بلانے کی ہدایت کی جائے جبکہ ڈپٹی سپیکر کو سپیکر قومی اسمبلی کے اختیارات استعمال کرنے سے روکا جائے۔ڈپٹی اسپیکر قاسم سوری، سیکرٹری پارلیمانی افئیرز اور سیکرٹری اسمبلی کو درخواست میں فریق بنایا گیا۔