بٹ خیلہ(نمائندہ مانند)آل پارٹی کانفرنس ملاکنڈ نے ٹول پلازہ کی تعمیر اور ایکسپریس فیڈ رکو مقامی گرڈ اسٹیشن سے منسلک نہ کرنے کے خلاف شدید ترین مزاحمت کا اعلان کردیا ، ٹول پلازہ میٹریل کو اکھاڑ کر فیڈر کی منتقلی میں تاخیر پرپیسکو افس کے سامنے دھرنا دیں گے ، مشتعل عوام نے جو بھی نقصان کیا اس کی ذمہ داری پیسکو حکام پر ہوگی، منتخب ممبران عوامی مسائل کے حل میں ناکام ہوچکے ہیں ، ہیڈ کوارٹر ہسپتال بٹ خیلہ میں بیک وقت دومیڈیکل افیسر کا قبضہ جنگل کے قانون کے مترادف ہے ، ان خیالات کا اظہار تحریک تحفظ ملاکنڈ کی طرف سے منعقدہ آل پارٹی کانفرنس سے خطاب کرتے ہوئے مقررین نے کیا ، مقررین میں تنظیم کے صدر سابق صوبائی وزیر شاہ راز خان ، جماعت اسلامی کے سابق ایم این اے بختیار معانی،امجد علی شاہ ، اے این پی کے ضلعی صدر اعجاز خان ، مسلم لیگ کے سٹی صدر علی محمد، جمعیت علماء اسلام کے سابق امیدوار صوبائی اسمبلی مولانا جاوید، تحریک اتحاد قبائل کے سابق سربراہ شفیع اللہ خان ، پیپلز پارٹی کے مسلم خان ، سابق یوسی ناظمین پیر عظمت شاہ ،سکندر حیات ، ایم کیو ایم کے کوارڈنیٹر ڈاکٹر سلمان ، متحدہ ٹریڈ یونین بٹ خیلہ کے صدر زوار خان ، جنرل سیکرٹری سلطان یوسف ،سابق صدر حاجی شاکراللہ شامل تھے ، انہوں نے کہا کہ پی ٹی آئی حکومت کے اعلان کے مطابق ملاکنڈ ڈویژن 2023 تک ٹیکس فری زون ہے ، مگر اس کے باوجود یہاں کے سرکاری ملازمین اور کنٹریکٹرز سے ٹیکس وصولی شروع کی گئی ہے ، ٹول پلازہ کی تعمیر کا مقصد گاڑیوں سے ٹیکس وصولی ہے ، بجلی ، گیس، ٹیلی فون بلوں میں بلاوجواز او رظالمانہ ٹیکسز کا شامل کیا جاتا ہے ، جس کے خلاف شدید مزاحمت کرکے سڑکوں پر نکل آئیں گے ، احتجاج کے دوران عوام کی جذبات کو کنٹرول کرنا پھر ہماری بس سے باہر ہوگی ، اس لئے حکومت ٹول پلازہ کی تعمیر کا منصوبہ واپس لے کر ایکسپریس فیڈر کو مقامی گرڈ اسٹیشن سے منسلک کیا جائے ، ہیڈ کوارٹر ہسپتال میں دو ایم ایسز کی تقرری کا تنازعہ ختم کرکے ایمرجنسی میں سینئر ڈاکٹر ز کی تعیناتی کو یقینی بنایا جائے ، ملاکنڈ ٹاپ سے پیران تک روزانہ کی بنیادپر حادثات روکنے کے لیے کلر کہار کی طرح لوڈ گاڑیوں کو کچھ دیر کے لیے ٹھنڈا کرنے کا انتظام کیا جائے ، ڈی ای او فی میل کی تعیناتی کرکے التوا میں پڑے ہوئے فائلز کو مکمل کیا جائے ، یوٹیلٹی بلز سے بلاجواز ٹیکسوں کو ختم کیا جائے ، درائے سوات میں ڈوبنے والے نوجوان کے قتل میں ملوث ملزمان کو گرفتار کرکے غمزدہ خاندان کو انصاف فراہم کیا جائے ۔
