نیویارک(مانند نیوز ڈیسک)ملکہ برطانیہ کی آخری رسومات میں شرکت کے بعد وزیراعظم شہباز شریف اقوام متحدہ کی جنرل اسمبلی کے 77 ویں اجلاس میں شرکت کے لئے نیویارک پہنچ گئے۔ اقوام متحدہ میں پاکستان کے مستقل مندوب منیر اکرم، امریکہ میں پاکستان کے سفیر مسعود خان اور دیگر اعلیٰ حکام نے ایئر پورٹ پر وزیر اعظم شہباز شریف کا استقبال کیا۔ وزیر اطلاعات مریم اورنگزیب اور دیگر بھی وزیر اعظم کے ہمراہ ہیں۔وزارت خارجہ کے مطابق وزیراعظم نیویارک میں اقوام متحدہ کی جنرل اسمبلی کے 77 ویں اجلاس میں شرکت کریں گے،وزیراعظم یو این سیکرٹری جنرل انتونیو گوتریس اور امریکی صدر جوبائیڈن کے استقبالیے میں شرکت کریں گے، اس موقع پر وزیراعظم کی امریکی صدر سے بات چیت بھی ہوگی۔وزارت خارجہ نے کہا کہ جنرل اسمبلی کے اجلاس میں وزیراعظم کا خطاب 23 ستمبر کو ہوگا، شہباز شریف سیلاب سے درپیش عالمی چیلنجز، ماحولیاتی تبدیلی، عالمی و علاقائی تنازعات اور جموں و کشمیر پر پاکستان کا موقف پیش کریں گے۔