پشاور(مانند میڈیا) چیئرمین پی ٹی آئی بیرسٹر گوہر نے بیرسٹر سیف کے دعوؤں کو مسترد کردیا۔پشاور میں میڈیا سے گفتگو کرتے ہوئے بیرسٹرگوہر نے کہا کہ بانی پی ٹی آئی سے ملاقات کیلئے ہرمکمن کوشش کرتے رہے ہیں، بیرسٹرسیف کا یہ کہنا بے بنیاد ہے کہ آفرکے باجود بانی پی ٹی آئی سے ملاقات نہیں کی، بیرسٹرسیف کے تمام دعوؤ ں کوبھی مستردکرتا ہوں، ان کے تمام دعوے جھوٹے ہیں۔انہوں نے کہاکہ بانی پی ٹی آئی سے ملاقات کیلئے عدالت اور مذاکرات کے ہر طریقے سے کوشش کی، تمام کوششوں کے باوجود ہمیں ایک بھی ملاقات کی اجازت نہیں دی گئی جب کہ مذاکراتی عمل کے دوران عمران خان تک رسائی بھی ہماری شرائط میں سے ایک تھی۔قبل ازیں بیرسٹر سیف نے ایک انٹرویو میں دعوی کیا کہ راجہ ناصر عباس اسٹیبلشمنٹ کے اہم لوگوں کے ساتھ براہ راست رابطے میں ہیں مگر وہ رابطے عمران خان کی رہائی کے لئے نہیں ہیں۔