مالاکنڈ (مانند نیوز) ضلعی انتظامیہ دیر بالا رمضان سے پہلے مارکیٹ کی صورتحال کو قریب سے مانیٹر کررہی ہے۔ڈپٹی کمشنرکی ہدایت پر اسسٹنٹ کمشنر شرینگل حفیظ اللہ نے پاتراک بازار میں ذخیرہ اندوزی، بلیک مارکیٹنگ کے حوالے سے ہول سیل غلہ ڈیلرز اورسبسیڈائزڈ آٹے کے دکانوں اور گوداموں کا جائزہ لیا۔اے سی نے درجنوں قصائی، چکن، سبزی/پھل، بیکری اور گروسری(کریانہ) شاپس کامعائنہ بھی کیا۔اسسٹنٹ کمشنر نے نرخنامہ نہ رکھنے،مقررہ قیمتوں سے انتہائی متجاوز ریٹس چارج کرنے، زائدالمیعاد آشیاء کی فروخت اور ناقص صفائی ستھرائی صورتحال پر کئی ایک دکانداروں کے خلاف پرائس کنٹرول ایکٹ اور فوڈ سٹف ایکٹ کے تحت حاصل اختیارات کی روشنی میں قانونی کارروائی کی اور ان کو آئندہ کے لئے محتاط رہنے کی تاکید کی۔اے سی نے شہریوں سے اپیل کی کہ وہ خود مارکیٹوں میں حکومتی احکامات کے خلاف ورزی کرنے والوں پر کھڑی نظر رکھیں اور ان کو براہ راست اے سی آفس میں رپورٹ کریں تاکہ ان کیخلاف بروقت قانونی کارروائی کی جاسکے۔