کچے میں آپریشن کا گیارہواں روز،پولیس گولی، ڈاکو راکٹ چلا رہے ہیں

رحیم یار خان(مانند نیوز ڈیسک) رحیم یار خان کے کچے میں ڈاکوؤں کے خلاف جاری آپریشن گیارہویں روز بھی جاری رہا، پولیس ترجمان کا کہنا ہے کہ پولیس گولی اور ڈاکو راکٹ استعمال کر رہے ہیں۔ پولیس کے ترجمان کے مطابق قابل سکھیانی کے علاقے کا محاصرہ کر کے ڈاکووں کی سپلائی لائن کاٹ دی ہے، اب تک 3 ڈاکو ہلاک، 18 گرفتار کیے جا چکے ہیں جبکہ بھاری اسلحہ برآمد کر چکے ہیں۔ پولیس کا کہنا ہے کہ سکھیانی گینگ کی جانب سے سخت مزاحمت کا سامنا ہے۔ ڈی پی او مہر ناصر سیال کے مطابق پولیس کی جانب سے ڈاکووں کے خفیہ ٹھکانوں پر بھر پورکارروائی جاری ہے۔ انہوں نے بتایا ہے کہ دولانی اور لوند گینگ کے ٹھکانے مسمار کر کے مزید 3 چوکیاں قائم کر دی گئی ہیں۔ ڈی پی او مہر ناصر سیال کا یہ بھی کہنا ہے کہ کچے کے تمام راستے اور گزر گاہیں سیل کر دی گئی ہیں، دریا میں بھی کشتیوں پر گشت جاری ہے۔