ہنگو (مانند نیوز)حکومت خیبر پختونخوا کے احکامات کی روشنی میں ڈپٹی کمشنر ہنگو حیدر حسین نے ضلع ہنگو میں بجلی کی لوڈ شیڈنگ کے مسئلے سے نمٹنے کیلئے اہم اجلاس کا انعقادکیا جس میں حاجی یوسف خان اورکزئی ایم این اے، شاہ تراب خان ایم پی اے، ڈسٹرکٹ پولیس آفیسر، ایڈیشنل ڈپٹی کمشنر ہنگو، ایکسیئن پیسکو، اسسٹنٹ کمشنرز، اور تمام متعلقہ اسٹیک ہولڈرز نے شرکت کی۔ ڈی سی ہنگو نے اجلاس کو صوبائی حکومت کی جانب سے عوام کو ریلیف دینے کے فارمولا کے بارے میں آگاہ کیا جس کے مطابق پہلے مرحلے میں ضلع ہنگو سے 3 فیڈرز کو لیا گیا۔ ان فیڈررز پر لوڈ شیڈنگ کا دورانیہ کم کرکے 12 گھنٹے پر لایا جائے گا، پیسکو بلز کی ادائیگی میں بہتری کی صورت میں لوڈ شیڈنگ کا دورانیہ مزید کم کیا جاسکے گا اور ساتھ ساتھ دوسری جانب غیر قانونی کنکشن کے خلاف آپریشن بدستور جاری رہے گا۔ اجلاس کے دوران تیار کی گئی حکمت عملی کو عملی جامہ پہنانے کیلئے کل سے بھرپور آپریشن شروع کرنے کا اعلان کیا گیا۔ آپریشن میں ہنگو میں بجلی چوری کے مسئلے کو مؤثر طریقے سے حل کرنے کیلئے تمام سٹیک ہولڈرز کو اپنا کردار موثر طریقے سے ادا کرنا ہوگا۔