کوہاٹ (مانند نیوز)حکومت خیبر پختونخوا کے احکامات کی روشنی میں ڈپٹی کمشنر کوہاٹ ڈاکٹر عظمت اللہ وزیرکی ہدایت پر بجلی چوری اور کنڈا مافیا کے خلاف آپریشن جاری ہے۔ ضلعی انتظامیہ کوہاٹ کے افسران نے واپڈا حکام اور کوہاٹ پولیس کے ہمراہ ضلع کوہاٹ کے مختلف علاقوں بشمول پرشئی، گل حسن بانڈہ، جرمااور ڈھوڈہ میں بجلی چوری کی روک تھام کے حوالے سے مشترکہ آپریشن کیا۔ ڈپٹی کمشنر کے مطابق کوہاٹ میں ضلعی انتظامیہ کی زیر نگرانی واپڈا حکام کے ہمراہ بجلی چوری کی روک تھام کے حوالے سے مشترکہ آپریشن جاری ہے. آپریشن کو بتدریج ضلع کوہاٹ کے دیگر علاقوں تک بڑھایا جائے گا تاکہ بجلی چوری کا خاتمہ کرکے عوام کو لوڈشیڈنگ سے نجات دلائی جاسکے۔ ڈپٹی کمشنر کوہاٹ نے عوام سے بھی اپیل کی ہے کہ وہ بجلی چوری کے خلاف جاری آپریشن کو کامیابی سے ہمکنار کرنے کیلئے آپریشن کرنے والے ٹیموں کے ساتھ بھرپور تعاون کریں۔