پشاور (مانند نیوز)ضلعی انتظامیہ پشاور نے یوم آزادی کے موقع پر ایک شاندار ریلی کا انعقاد کیا، جس کی قیادت ڈپٹی کمشنر پشاور سرمد سلیم اکرم نے کی۔ ریلی خیبر روڈ سے شروع ہو کر یونیورسٹی روڈ سے گزرتی ہوئی واپس خیبر روڈ پر اختتام پزیر ہوئی۔ریلی میں ضلعی انتظامیہ پشاور کے افسران، ریونیو افسران و اہلکاران،مختلف سرکاری اداروں کے نمائندے، اور عام شہریوں نے بھرپور شرکت کی۔ شرکاء نے پاکستان کی آزادی کے 77 ویں یوم آزادی کے موقع پر قومی پرچم تھامے، حب الوطنی کے جوش و جذبے کے ساتھ مختلف نعروں کے ذریعے وطن سے محبت کا اظہار کیا۔ڈپٹی کمشنر پشاور سرمد سلیم اکرم نے اس موقع پر خطاب کرتے ہوئے کہا کہ یوم آزادی ہمیں اس عزم کی یاد دلاتا ہے کہ ہم اپنی محنت اور اتحاد کے ذریعے اپنے ملک کو ترقی کی راہ پر گامزن رکھیں۔ انہوں نے مزید کہا کہ پشاور کی عوام نے ہمیشہ پاکستان کے لیے بے پناہ قربانیاں دی ہیں اور آج بھی اسی جذبے کے ساتھ ملک کی تعمیر و ترقی میں اپنا کردار ادا کر رہی ہے۔ریلی کے دوران شرکاء نے شہر کی مختلف سڑکوں پر پاکستانی پرچم لہرائے اور حب الوطنی کے گیت گائے۔ اس موقع پر سیکیورٹی کے سخت انتظامات کیے گئے تھے تاکہ ریلی کے شرکاء کی حفاظت کو یقینی بنایا جا سکے۔ضلعی انتظامیہ پشاور نے ریلی کے انعقاد پر عوام کی بھرپور شرکت پر ان کا شکریہ ادا کیا اور مستقبل میں بھی ایسے ایونٹس کے انعقاد کا عزم ظاہر کیا۔