وانا (مانند نیوز) ڈسٹرکٹ پریس کلب وانا جنوبی وزیرستان لوئر کے تمام ممبران کا ایک اہم اجلاس قائم مقام صدر نور علی وزیر کی زیر صدارت منعقد ہوا جس میں پریس کلب کے اندرونی معاملات میں سیاسی رہنماؤں اور منتخب نمائندوں کی غیر ضروری مداخلت پر شدید غم و غصے کا اظہار کیا گیا۔ اجلاس میں پریس کلب کے اراکین نے سیاسی مداخلت کو یکسر مسترد کرتے ہوئے اسے صحافت کی آزادی اور ادارے کی ساکھ کے لئے نقصان دہ قرار دیا۔اجلاس کے دوران صحافیوں نے پریس کلب کے مسائل اور صحافی برادری کو درپیش چیلنجز پر تفصیلی تبادلہ خیال کیا اور ان عناصر کی نشاندہی کی جنہوں نے پریس کلب کے مفادات کو نقصان پہنچانے کی کوشش کی ہے۔ شرکاء نے واضح کیا کہ کسی بھی غیر متعلقہ فرد یا سیاسی نمائندے کو پریس کلب کے معاملات میں مداخلت کا حق نہیں دیا جائے گا۔قائم مقام صدر نور علی وزیر نے اس موقع پر اعلان کیا کہ دو نومبر کو ایک ہنگامی اجلاس طلب کیا جائے گا جس میں ان معاملات پر غور کیا جائے گا اور صحافی برادری کے بہترین مفاد میں اہم فیصلے باہمی مشاورت سے کیے جائیں گے۔