ہنگو(مانند نیوز)خیبر پختونخوا: ضلع کرم کے فسادات سے متاثرہ افراد میں امدادی سامان کی تقسیم۔خیبر پختونخوا کے ضلع کرم میں حالیہ سنی شیعہ فسادات کے متاثرین کی مدد کے لیے آج حکومت پاکستان، جی او سی 9 ڈویژن، اور کمانڈنٹ ٹل سکاؤٹس کے خصوصی اقدامات کے تحت امدادی سامان کی تقسیم کی گئی۔ یہ اقدام علاقے میں امن و امان کی بحالی اور متاثرہ افراد کی فوری بحالی کے لیے اہم ہے۔ تقسیم کیے گئے امدادی سامان میں خیمے، سردی سے بچاؤ کے لیے کمبل، اور روزمرہ کی دیگر ضروری اشیاء شامل ہیں۔ اس عمل کا مقصد فسادات سے بے گھر ہونے والے افراد کو سخت سرد موسم میں تحفظ فراہم کرنا اور ان کے لیے زندگی کی بنیادی سہولیات مہیا کرنا ہے۔ متاثرین اور ملک مشیران نے امداد کے لیے حکومت اور افواج پاکستان ٹل سکاوٹس کا شکریہ ادا کرتے ہوئے کہا کہ یہ سامان ان کے لیے ایک بڑی سہولت اور حوصلے کا باعث ہے۔ علاقے کے عمائدین نے اس عمل کو خوش آئند قرار دیتے ہوئے امید ظاہر کی کہ اس سے فرقہ وارانہ ہم آہنگی کو فروغ ملے گا اور علاقے میں امن قائم ہوگا۔ حکام نے اس موقع پر اس عزم کا اظہار کیا کہ وہ بحالی کے کاموں کو تیز تر بنائیں گے اور ہر متاثرہ فرد کو مدد پہنچائیں گے۔ عوامی حلقوں نے اس امدادی اقدام کو حکومت اور افواج کی عوام دوست پالیسیوں کا عملی مظہر قرار دیا ہے۔