لوئر دیر (مانند نیوز)حکومت خیبر پختونخوا کے محکمہ توانائی و بجلی کے سیکرٹری زبیرخان نے ضلع لوئر دیر میں واقع 40.8 میگاواٹ کوٹو ہائیڈرو پاور پراجیکٹ کا دورہ کیا تاکہ منصوبے کی موجودہ پیشرفت اور آپریشنل تیاری کا جائزہ لیا جا سکے اس موقع پر پراجیکٹ ڈائریکٹر انجینئر سلطان روم اور ڈپٹی ڈائریکٹر انجینئر مقیم نے سیکرٹری کو بریفنگ دی کہ منصوبے کا تعمیراتی مرحلہ کامیابی سے مکمل ہو چکا ہے اور اب یہ اہم مرحلے یعنی ٹیسٹنگ اور کمیشننگ میں داخل ہو چکا ہے۔ چینی کنٹریکٹر کے انچارج مسٹر ژاؤ نے سیکرٹری کو آگاہ کیا کہ تکنیکی ٹیموں کی نقل و حرکت سے متعلق سیکیورٹی خدشات“میکینیکل رن”کے بروقت انعقاد میں رکاوٹ بن رہے ہیں، جو کہ مکمل کمرشل آپریشن سے قبل ایک نہایت اہم قدم ہے۔سیکرٹری توانائی و بجلی زبیرخان نے فوری ایکشن لیتے ہوئے ڈپٹی کمشنر لوئر دیر سے رابطہ کیا تاکہ چینی تکنیکی ٹیم کی محفوظ اور بروقت نقل و حرکت کو ممکن بنایا جا سکے۔ مسٹر ژاؤ نے مزید بتایا کہ جیسے ہی میکینیکل رن کامیابی سے مکمل ہو گا، منصوبہ کسی تاخیر کے بغیر کمرشل آپریشن کی طرف بڑھ جائے گا۔پراجیکٹ ٹیم نے سیکرٹری توانائی و بجلی کو گرڈ کے ساتھ کامیاب انٹرکنیکشن اور سوئچ یارڈ کی انرجائزیشن کے جاری کام سے بھی آگاہ کیا۔ انہیں بتایا گیا کہ کمرشل آپریشن (COD) کمیٹی کو متحرک کر دیا گیا ہے اور 132 کے وی ٹرانسمیشن لائن کے شٹ ڈاؤن کی باقاعدہ منظوری بھی دے دی گئی ہے تاکہ اس مرحلے کو مکمل کیا جا سکے سیکرٹری نے پراجیکٹ حکام کی بروقت کوششوں کو سراہا، خاص طور پر انٹرکنیکشن کے اہداف کے حصول اور سوئچ یارڈ کی انرجائزیشن کے آغاز پر۔ انہوں نے زور دیا کہ تمام متعلقہ ادارے ہم آہنگی سے کام کریں تاکہ باقی ماندہ ٹیسٹنگ سرگرمیاں جلد اور مؤثر طریقے سے مکمل ہوں اور منصوبہ جلد از جلد کمرشل آپریشن حاصل کر سکے۔