پشاور (مانند نیوز ڈیسک) چیئرمین پاکستان پیپلز پارٹی بلاول بھٹو زرداری کی ہدایت پر جمعہ 10 دسمبر اور جمعہ 17 دسمبر کو خیبرپختونخوا کے تمام اضلاع میں بڑھتی ہوئی مہنگائی بیروزگاری سرکاری ملازمین کی نوکریوں سے برخاستگی اور لاقانونیت کے خلاف احتجاجی مظاہرے کیے جائیں گے۔ خیبر پختو نخوا کے صوبائی صدر نجم الدین خان نے میڈیاکوبتایا کہ صوبائی دارالحکومت سمیت تمام ضلعی ہیڈکوارٹرز میں مظاہرے کیے جائیں گے۔ ضلعی صدور کوبھی ہدایات جاری کردی گئی ہیں۔ نجم الدین خان نے کہا کہ پی ٹی آئی حکومت ہر محاذ پر ناکام ہوگئی ہے۔ پی ٹی آئی حکومت نے روزگار چھین کر عوام کو فاقوں پر مجبور کردیاہے۔کسی کی جان ومال اور عزت وآبرو محفوظ نہیں۔ نجم الدین خان نے مزید کہا کہ نیب نے پی ٹی آئی کو خوش رکھنے کی خاطر پورے ملک کو ٹارچر سیل میں تبدیل کردیاہے۔ ہم نیب غنڈہ گردی کی مذمت کرتے ہیں۔نجم الدین خان نے مزید کہا کہ مہنگائی آسمان کو چھورہی ہے۔ سرعام لوٹ مار، ڈکیتیوں نے حکومتی نااہلی اشکارکردی ہے۔