نیویارک (مانند نیوز ڈیسک) عالمی مالیاتی ادارے (آئی ایم ایف)نے کہا ہے کہ روس یوکرین کی جنگ دنیا کی معیشت کے لیے تباہ کن ہے۔غیر ملکی خبر رساں ادارے کے مطابق آئی ایم ایف نے بیان میں کہا کہ روس کے حملے کے اثرات دنیا کی معیشت پر ترقی کی رفتار میں کمی کا باعث بنے گی جبکہ مہنگائی میں اضافے کی شکل میں سامنے آنے کے ساتھ ساتھ عالمی معیشت کو لمبے عرصے کے لیے ایک نئے سانچے میں ڈھال سکتی ہے۔عالمی مالیاتی ادارے کی جانب سے جاری کردہ بیان میں کہا گیا ہے کہ پناہ گزینوں کی لہر اور دوسرے انسانی مسائل کے علاوہ اس جنگ سے افراط زر بڑھے گی جبکہ خوراک اور توانائی کی اشیا مہنگی ہوں گی۔ جنگی صورت حال کے اثرات کاروبار میں خلل، سپلائی چینز کی بندش اور یوکرین کے ہمسایہ ممالک میں ترسیلات کی کمی کی صورت میں سامنے آ سکتے ہیں۔ بیان میں کہا گیا کہ دنیا بھر میں تجارت اور کاروبار بری طرح متاثر ہوں گے جبکہ سرمایہ کاروں میں غیریقینی کی صورتحال بڑھے گی جس سے اثاثوں کی قیمتیں گر جائیں گی۔ مالی حالات تنگی کی طرف جائیں گے اور ابھرتی ہوئی مارکیٹس سے سرمائے کا اخراج ہو سکتا ہے۔افریقہ اور مشرق وسطیٰ میں خوراک کے سامان کی قلت کا بھی خدشہ ہے جہاں مصر جیسے ممالک اپنی گندم کا 80 فیصد روس اور یوکرین سے درآمد کرتے ہیں۔