اسلام آباد(مانند میڈیا): نائب وزیراعظم و وزیر خارجہ سینیٹر محمد اسحاق ڈار کی زیرِ صدارت قومی اقتصادی کونسل کی ایگزیکٹو کمیٹی (ایکنک) کا اہم اجلاس منعقد ہوا، جس میں ملک بھر میں توانائی، روڈ انفراسٹرکچر، واٹر سپلائی، صحت، شہری ترقی اور فرانزک سائنس کے شعبوں سے متعلق 11 اہم ترقیاتی منصوبوں کی منظوری دی گئی۔ ترجمان دفترِ خارجہ کے مطابق منظور کیے گئے اہم منصوبوں میں خیبر پختونخوا کے ضلع لوئر دیر میں 40.8 میگاواٹ کے ‘کوٹو ہائیڈرو پاور پراجیکٹ’ کی تعمیر، اور گلگت بلتستان کے لیے 100 میگاواٹ کے تقسیم شدہ سولر فوٹو وولٹک پلانٹس شامل ہیں۔ علاوہ ازیں، بلوچستان کے لیے میرانی ڈیم سے گوادر کو پانی کی فراہمی، لسبیلہ کینال کی بحالی و تزئینِ نو، اور بلیدہ–پروم و پروم–چیڈگئی سڑکوں کی تعمیر کی منظوری دی گئی۔ دیگر منصوبوں میں اسلام آباد (ترلائی) میں ‘کنگ سلمان بن عبدالعزیز آل سعود ہسپتال’ کا قیام، قومی فرانزک ایجنسی کی جدید لیبارٹری، پنجاب اربن لینڈ سسٹمز اینہانسمنٹ پراجیکٹ (PULSE)، این جی سی نیٹ ورک کے لیے ری ایکٹیو پاور کمپنسیشن آلات، اور درگئی–شاہبوزئی–تونسہ شریف روڈ کی اپ گریڈیشن شامل ہیں۔ اجلاس سے خطاب کرتے ہوئے نائب وزیراعظم اسحاق ڈار نے تمام منصوبوں کو مقررہ وقت پر اور اضافی لاگت کے بغیر مکمل کرنے کی سخت ہدایت کی۔ انہوں نے حکام کو مالیاتی نظم و ضبط برقرار رکھنے اور تمام انتظامی رکاوٹیں دور کرنے کا حکم دیتے ہوئے کہا کہ "ترقیاتی منصوبوں کا بنیادی اور واحد مقصد عوام کی فلاح و بہبود اور سہولت ہونا چاہیے۔” اجلاس میں وفاقی وزیر برائے منصوبہ بندی، ترقی و خصوصی اقدامات، پنجاب کے سینئر وزیر، بلوچستان کے وزیر منصوبہ بندی و ترقی، وزیراعظم کے معاونِ خصوصی طارق باجوہ، سیکرٹری کابینہ، سیکرٹری منصوبہ بندی، سیکرٹری اقتصادی امور، چیٔرمین سی ڈی اے اور وفاقی و صوبائی اداروں کے اعلیٰ حکام نے شرکت کی۔