اسلام آباد(مانند نیوز) وزیراعظم کے مشیر برائے سیاسی و عوامی امور انجینئر امیر مقامنے ہفتہ کو چیئرمین واپڈا لیفٹیننٹ جنرل(ر) سجاد غنی کوہستان جرگہ کے اراکین کے ہمراہ ملاقات کی اور واپڈا کے ساتھ معاہدے اور کوہستان میں بجلی کے منصوبوں سے متعلق امور پر تبادلہ خیال کیا۔ وزیر اعظم کے مشیر انجینئر امیر مقام نے کہا کہ وہ کوہستان جرگہ کے اراکین کا ان پر اعتماد کرنے پر شکر گزار ہیں۔ انہوں نے کہا کہ کوہستان کے عوام کے لیے کوششیں جاری رکھیں گے۔ انجینئر امیر مقام نے کہا کہ حکومتیں آتی جاتی ہیں لیکن وہ ہمیشہ کوہستان کے عوام کے ساتھ کھڑے رہیں گے۔ اس موقع پر وزیراعظم کے مشیر نے جرگے کے مطالبات کو دہرایا۔ چیئرمین واپڈا لیفٹیننٹ جنرل سجاد غنی (ر) نے کہا کہ وہ کوہستان کے عوام کے ساتھ اپنا وعدہ پورا کریں گے۔ انہوں نے جرگہ کے اراکین کو مسائل کے حل کے لیے اجتماعی نقطہ نظر میں دلچسپی دکھانے پر مبارکباد دی۔