سوات(مانند نیوز) ضلع سوات میں نا فذدفعہ 144 میں توسیع کرتے ہوئے ہر قسم کی ہوائی فائرنگ اور آتش بازی پر پابندی عائد کردی گئی ہے۔ ڈسٹرکٹ مجسٹریٹ سوات عرفان اللہ وزیر کی جانب سے جاری حکم نامے میں کہا گیا ہے کہ خلاف ورزی کی صورت میں سیکشن 188 پی پی سی کے تحت کارروائی عمل میں لائی جائے گی۔ پابندی کا اطلاق 60 روز کے لئے ہوگا۔ حکم نامے میں کہا گیا ہے کہ عوام خصوصا نوجوان خوشی کے لمحات اور نجی تقریبات کے دوران ہوائی فائرنگ اور آتش بازی کا مظاہرہ کرتے ہیں جس کی وجہ سے ضلع میں امن و امان کی فضا برقرار رکھنے میں مشکلات پیش اتی ہیں اور قیمتی جانوں کے نقصان کا بھی خدشہ رہتا ہے جس کی بناء پر پابندی لگائی جاتی ہے۔