پشاور(مانند نیوز) گورنرخیبرپختونخواحاجی غلام علی نے عراق میں عالمی مقابلہ قرأت میں پہلی پوزیشن حاصل کرنے والے خیبرپختونخوا کے ضلع مانسہرہ سے تعلق رکھنے والے حافظ قاری محمد ابوبکر کو منگل کے روز گورنرہاوس میں خصوصی مد عو کیا اوراُن سے ملاقات کی۔گورنرنے قاری ابوبکرکوعالمی مقابلہ قرأت میں ملک و قوم کا نام روشن کرنے اور پہلی پوزیشن حاصل کرنے پر تعریفی سند اور نقدانعام سے نوازا۔ میئرپشاور حاجی زبیرعلی، حافظ قاری محمدابوبکر کے والد ثاقب ظہیر اور قاری احمدعلی بھی اُن کے ہمراہ تھے۔ گورنر حاجی غلام علی نے عراق میں عالمی مقابلہ قرأت میں پہلی پوزیشن حاصل کرنے پر حافظ قاری محمد ابوبکر اور اُن کے والدکو مبارکباد دی اور کہاکہ یہ یقینا پاکستان کیلئے ایک بہت بڑا اعزازہے کہ عالمی سطح پر ہونیوالے قرأت کے مقابلوں میں پہلی پوزیشن حاصل کی گئی۔ قاری محمد ابوبکر نے اس سے پہلے بھی ایران میں عالمی مقابلہ قرأت میں روح پرور قرأت کا مظاہرہ کرتے ہوئے دوسری پوزیشن حاصل کی تھی۔ گورنرنے اس موقع پر حافظ قاری محمدابوبکراوراُن کے والدین واساتذہ کوبھی خراج تحسین پیش کیا۔ حافظ قاری محمدابوبکرکے والد نے گورنرہاوس مدعو کرنے اور حوصلہ افزائی پرگورنر کاشکریہ ادا کیا۔
