کوہاٹ (مانند نیوز)خیبرپختونخوا کے وزیر قانون و خزانہ آفتاب عالم آفریدی ایڈوکیٹ نے جمعہ کے روز کوہاٹ کے منتخب اراکین صوبائی اسمبلی شفیع اللہ جان اور داؤد شاہ آفریدی کے ہمراہ کوہاٹ گرڈ اسٹیشن کا اچانک دورہ کیا جہاں انہوں نے کوہاٹ میں بجلی کی غیر اعلانیہ لوڈشیڈنگ پر سخت برہمی کا اظہار کرتے ہوئے صوبائی وزیر آفتاب عالم آفریدی نے خود ہی موقع پر لوڈشیڈنگ کا شیڈول تیار کیا اور واپڈا کے حکام کو اسی شیڈول پر عملدرآمد یقینی بنانے کی ہدایت کی۔ وزیر قانون کا کہنا تھا کہ وفاقی حکومت اپنی ذمہ داری پوری نہیں کر رہی۔ واپڈا وفاق کے زیرانتظام ادارہ ہے جو ہمارے صوبے کے ساتھ زیادتی کر رہا ہے۔ وفاق میں بیٹھی مینڈیٹ چور حکومت خیبرپختونخوا کے عوام کے ساتھ مسلسل زیادتی کر رہی ہے۔ ان کا مزید کہنا تھا کہ ہم اپنے عوام کے ساتھ کھڑے ہیں۔ وزیراعلیٰ خیبرپختونخوا علی امین گنڈاپور نے صوبے میں تمام پارلیمنٹیرینز کو اپنے اپنے علاقوں میں گرڈ اسٹیشنز کا دورہ کر کے لوڈشیڈنگ شیڈول طے کرنے اور اس پر عملدرآمد کروانے کی ہدایات دی ہیں۔آفتاب عالم نے کہا کہ آج ان کا اپنے اراکین اسمبلی کے ہمراہ گرڈ سٹیشن کا دورہ وزیر اعلیٰ کے ہدایات پر عملدرآمد کیلئے کیا ہے۔