پشاور(مانند نیوز)وزیراعلیٰ علی امین گنڈاپور اور مشیر صحت احتشام علی کی ہدایت پر ایمرجنسی ادویات کی بھاری کھیپ سیکرٹری صحت عدیل شاہ اور ڈی جی ہیلتھ ڈاکٹر محمد سلیم کی نگرانی میں اپر کرم بھیج دی گئی ہے۔ سیکرٹری صحت عدیل شاہ کے مطابق یہ ادویات ایم ایس پاڑہ چنار کو ایمرجنسی صورتحال سے نمٹنے کے لیے حوالے کی جارہی ہیں۔ چار ہزار کلوگرام وزنی پچاس لاکھ مالیت کی ایمرجنسی ادویات حکومت خیبرپختونخوا کے سرکاری ہیلی کاپٹر ایم آئی 17 کی دو پروازوں کے ذریعے پہنچائی جارہی ہیں۔انہوں نے مزید بتایا کہ مسلسل زمینی رابطے منقطع ہونے اور شدید سرد موسم کی وجہ سے کرم میں ادویات کی کھپت میں اضافہ ہوا ہے۔ سیکرٹری ہیلتھ نے یہ بھی بتایا کہ ایم ایس پاڑہ چنار نے ادویات کی کمی کی پیشگی اطلاع دی تھی جس پر محکمہ صحت نے بحران سے قبل ہی ادویات فراہم کردی ہیں۔ ایمرجنسی کے علاوہ اپر اور لوئر کرم کے لیے معمول کی خریداری کی ادویات بھی ہیلی کاپٹر کے ذریعے بھیجی جارہی ہیں۔