ایبٹ آباد(نمائندہ مانند) وزیراعلیٰ خیبرپختونخوا علی امین گنڈاپور کے عوامی ایجنڈے کے تحت ڈپٹی کمشنر ایبٹ آباد کیپٹن (ر) ثناء اللہ خان کی خصوصی ہدایات پر ایڈیشنل ڈپٹی کمشنر ریلیف اینڈ ہیومن رائٹس امان اللہ سعید کی زیرصدارت سپیشل پرسنز (مرد و خواتین) کے مسائل کے حل کے لیے کھلی کچہری منعقد ہوئی۔کھلی کچہری میں سپیشل پرسنز کے نمائندوں نے بھرپور شرکت کی اور اپنے مسائل پیش کیے۔ اس موقع پر سوشل ویلفیئر اور محکمہ صحت کے نمائندے بھی موجود تھے جن سے سپیشل پرسنز کے مسائل کے حل کے حوالے سے تفصیلی بات چیت کی گئی۔ایڈیشنل ڈپٹی کمشنر امان اللہ سعید نے شرکاء کے مسائل غور سے سننے کے بعد متعلقہ محکموں کے افسران کو موقع پر ہدایات جاری کیں تاکہ سپیشل پرسنز کے مسائل کو فوری حل کیا جا سکے۔ کھلی کچہری سپیشل پرسنز کو ان کے مسائل کے حل کے لیے ایک اہم پلیٹ فارم فراہم کرنے کی ایک کامیاب کوشش تھی۔ ضلعی انتظامیہ نے یقین دہانی کرائی کہ ان کے مسائل کے حل کے لیے تمام ممکنہ اقدامات کیے جائیں گے۔