ہنگو (مانند نیوز)حکومت خیبر پختونخوا کے احکامات کی روشنی میں ڈپٹی کمشنر ہنگو گوہر زمان وزیرکی ہدایات پر ضلعی انتظامیہ کے افسران نے ضلع کُرم کے کشیدہ حالات کے پیشِ نظر گورنمنٹ گرلز ڈگری کالج ٹل میں متاثرین کرم کیلئے قائم کردہ ٹی ڈی پی کیمپ کا دورہ کیا۔اس موقع پر فراہم کردہ سہولیات سمیت صفائی کی صورتحال کا بھی جائزہ لیا گیا۔ ڈپٹی کمشنر ہنگو کی ہدایات پر ٹی ڈی پی کیمپ میں قائم کمیونٹی کچن میں تمام تر ضروری سہولیات بھی فراہم کر دی گئی ہیں۔ضلع کُرم کے متاثرہ خاندانوں نے فراہم کردہ سہولیات پر اطمینان کا اظہار کرتے ہوئے ضلعی انتظامیہ ہنگو کا شکریہ ادا کیا۔ضلعی انتظامیہ ہنگو کی جانب سے نمائندگی کرتے ہوئے اسسٹنٹ کمشنر دوآبہ نواب خان بنگش نے اس اقدام کو خدمت خلق سمجھ کراپنافرض اولین قرار دیا اور آئندہ کیلئے بھی اس قسم کی سہولیات فراہم کرنے کے عزم کو دہرایا۔