باجوڑ (مانند نیوز)خیبرپختونخوا حکومت کے احکامات اور ڈپٹی کمشنر باجوڑ شاہد علی خان کی ہدایت پر باجوڑ سپورٹس کمپلیکس ہاکی گراؤنڈ میں معرکہ حق آزادی سپورٹس فیسٹیول کا باقاعدہ افتتاح کر دیاگیا۔مہمانِ خصوصی ایڈیشنل کمشنر شاہد رفیق گنڈا پور تھے، جبکہ اے اے سی نواز علی، ڈسٹرکٹ سپورٹس آفیسر باجوڑ، عمائدین علاقہ، کھلاڑیوں اور کثیر تعداد میں شائقینِ کھیل نے شرکت کی۔ مہمانِ خصوصی نے فیسٹیول کا افتتاح کرتے ہوئے نوجوانوں کی کھیلوں میں شمولیت کو سراہا اور حکومت کی جانب سے کھیلوں کے فروغ کے عزم کا اعادہ کیا۔ بہترین انتظامات پر ڈسٹرکٹ سپورٹس آفیسر اور سٹاف کو خراجِ تحسین پیش کیا گیا۔فیسٹیول میں کرکٹ، والی بال، بیڈمنٹن، باسکٹ بال، مارشل آرٹس، تائیکوانڈو، جمناسٹک، ایتھلیٹکس اور فٹبال کے دلچسپ مقابلے 14 اگست 2025 تک جاری رہیں گے۔ یہ ایونٹ نوجوانوں کو صحت مند سرگرمیوں میں شامل کرنے، قومی جذبے کو فروغ دینے اور یومِ آزادی کی خوشیوں کو یادگار بنانے کا ایک اہم قدم ہے۔صوبائی حکومت کھیلوں کے فروغ، نوجوانوں کی فلاح اور مثبت سرگرمیوں کے لیے پرعزم ہے۔ اس کے علاوہ انڈر-13 فٹبال ٹورنامنٹ کے مہمانِ خصوصی ڈپٹی ڈائریکٹر اسپورٹس مسٹر مفتاح اللہ نے ڈی ایس او باجوڑ، اے ڈی اسپورٹس ضم شدہ اضلاع اور مقامی معززین کے ہمراہ ایونٹ کا باضابطہ افتتاح کیا۔ اس موقع پر کھلاڑیوں میں فٹبالز سمیت دیگر ضروری سامان تقسیم کیا گیا تاکہ نوجوان کھلاڑیوں کو کھیلوں میں مزید مواقع اور حوصلہ مل سکے۔