وانا (مانند نیوز ) جنوبی وزیرستان لوئر کے باسیوں نے شکوہ کیا ہے کہ ڈسٹرکٹ ہیڈکوارٹر ہسپتال وانا عملاً طبی سہولیات سے محروم ہو چکا ہے۔ مریضوں کے مطابق نہ صرف مستند و معیاری ادویات مفقود ہیں بلکہ انجکشن، سیرنج اور سٹاپر جیسی ابتدائی و ناگزیر اشیائے علاج بھی اکثر ناپید رہتی ہیں۔ ان کے بقول یہ ہسپتال اب ایک بے روح عمارت کا منظر پیش کرتا ہے جہاں شفا کے بجائے مریض مزید اذیت و کرب میں مبتلا ہو جاتے ہیں۔علاقہ مکینوں نے شدید افسوس و مایوسی کا اظہار کرتے ہوئے کہا کہ ہم اسی مملکت کے شہری ہیں، لیکن ہمارے ساتھ ایسا برتاؤ روا رکھا جا رہا ہے گویا ہم ثانوی درجے کی رعایا ہوں۔عوامی نمائندوں اور باشعور حلقوں نے حکومت سے پُرزور مطالبہ کیا کہ فی الفور اس ادارے کو فعال بنانے کے لیے خاطر خواہ وسائل مہیا کیے جائیں، اور ادویات کی بلا تعطل فراہمی یقینی بنائی جائے، تاکہ مقامی مریض علاج معالجے کے لیے دوسرے شہروں کی خاک نہ چھانیں۔ ان کے مطابق صحت کی سہولت ہر انسان کا بنیادی و ناقابلِ انکار حق ہے، جس سے وزیرستان کے عوام کو محروم رکھنا انصاف کے بنیادی تقاضوں کی صریح نفی ہے۔