پشاور(مانند نیوز) ضلع مردان سے تعلق رکھنے والی باصلاحیت، فرض شناس اور پیشہ ور سرکاری افسر رقیہ نواز خان کے لیے ایک اور بڑا اعزاز سامنے آیا ہے۔ انہیں گورنر ہاؤس پشاور میں منعقد ہونے والی ایک باوقار تقریب کے دوران "فخرِ پختونخوا ایوارڈ 2026” کے لیے نامزد کیا گیا ہے۔ ان کی یہ نامزدگی ان کی شاندار پیشہ ورانہ خدمات، دیانت داری، محنت، قائدانہ صلاحیتوں اور عوامی خدمت کے جذبے کا اعتراف ہے، جبکہ یہ اعزاز نہ صرف ان کے لیے بلکہ پورے ضلع مردان اور خیبر پختونخوا کے عوام کے لیے بھی باعثِ فخر ہے۔رقیہ نواز خان اس وقت خیبر پختونخوا فوڈ سیفٹی اینڈ حلال فوڈ اتھارٹی میں بطور اسسٹنٹ ڈائریکٹر ضلع ہری پور میں اپنی ذمہ داریاں سرانجام دے رہی ہیں۔ اس سے قبل وہ ضلع خیبر، مردان اور پشاور میں بھی مختلف اہم انتظامی ذمہ داریاں نبھا چکی ہیں۔ انہیں یہ منفرد اعزاز بھی حاصل ہے کہ وہ ضلع خیبر میں تعینات ہونے والی پہلی خاتون فوڈ سیفٹی آفیسر تھیں، جہاں انہوں نے نہایت جرات، پیشہ ورانہ مہارت اور ذمہ داری کے ساتھ اپنے فرائض انجام دیے اور خواتین افسران کے لیے ایک نئی مثال قائم کی۔اپنی سرکاری ذمہ داریوں کے دوران رقیہ نواز خان نے عوام کو معیاری، محفوظ اور حلال خوراک کی فراہمی کو یقینی بنانے کے لیے نمایاں کردار ادا کیا۔ انہوں نے فوڈ سیفٹی قوانین پر مؤثر عملدرآمد، ہوٹلوں، ریسٹورنٹس، بیکریوں، فوڈ فیکٹریوں اور دیگر کاروباری مراکز کی باقاعدہ نگرانی، غیر معیاری اور مضر صحت اشیائے خور و نوش کے خلاف کارروائیوں اور عوام میں فوڈ سیفٹی سے متعلق شعور اجاگر کرنے میں قابلِ قدر خدمات انجام دیں۔ ان کی پیشہ ورانہ مہارت، شفاف طرزِ عمل، فرض شناسی اور قانون پر سختی سے عملدرآمد کو محکمانہ اور عوامی حلقوں میں ہمیشہ سراہا گیا ہے۔ذرائع کے مطابق رقیہ نواز خان نے جہاں محکمہ فوڈ سیفٹی اینڈ حلال فوڈ اتھارٹی کی کارکردگی بہتر بنانے میں اہم کردار ادا کیا، وہیں عوام میں صحت مند خوراک، حفظانِ صحت، خوراک کے معیار اور فوڈ سیفٹی قوانین کے بارے میں آگاہی پیدا کرنے کے لیے بھی متعدد کامیاب اقدامات کیے۔ ان کی انتھک محنت، دیانت داری، پیشہ ورانہ صلاحیتوں اور عوامی خدمت کے جذبے کے اعتراف میں انہیں "فخرِ پختونخوا ایوارڈ 2026” کے لیے نامزد کیا گیا، جو ان کے روشن کیریئر میں ایک اہم سنگِ میل تصور کیا جا رہا ہے۔سماجی، تعلیمی، سرکاری اور عوامی حلقوں نے رقیہ نواز خان کو اس اہم اعزاز کے لیے نامزد ہونے پر دلی مبارکباد پیش کرتے ہوئے کہا کہ وہ خیبر پختونخوا کی باصلاحیت خواتین کے لیے ایک بہترین رول ماڈل ہیں۔ ان کا کہنا تھا کہ ایسے اعزازات نہ صرف سرکاری افسران کی حوصلہ افزائی کرتے ہیں بلکہ نوجوان نسل، خصوصاً طالبات اور خواتین کو محنت، دیانت داری، لگن اور قومی خدمت کے جذبے کے ساتھ آگے بڑھنے کی ترغیب بھی دیتے ہیں۔شہریوں نے اس امید کا اظہار کیا کہ رقیہ نواز خان آئندہ بھی اسی جذبے، پیشہ ورانہ مہارت اور عزم کے ساتھ اپنی ذمہ داریاں انجام دیتی رہیں گی اور صوبے میں فوڈ سیفٹی، عوامی صحت، معیاری و محفوظ خوراک کی فراہمی اور قانون کی مؤثر عملداری کے لیے اپنی خدمات جاری رکھتے ہوئے مردان اور خیبر پختونخوا کا نام قومی سطح پر مزید روشن کریں گی۔