بٹ خیلہ (مانند نیوز ڈیسک) الہ ڈھنڈ فضل آباد میں سرکاری سکول پر قبضہ کرانے کا انکشاف ہوگیا ہے، سکول کے لیے زمین فراہم کرنے والے مالک نے اساتذہ کو نکال کر سکول کو خالی کردیاہے۔ اس امرکا انکشاف ڈپٹی کمشنر ملاکنڈ کی طرف سے لیوی پوسٹ الہ ڈھنڈ میں منعقدہ کھلی کچہری کے دوران اس وقت ہوا جب مقامی نوجوان صحافی حمد نواز نے سکول کی چاردیواری تعمیر کرانے کا مطالبہ کردیا، ڈی سی ملاکنڈ نے جب ایس ڈی او ایجوکیشن سے وضاحت طلب کی تو انہوں نے انکشاف کیا کہ سکول کے لئے مفت اراضی فراہم کرنے والے شخص نے سکول کو اساتذہ اور طلبہ خالی کراکر اس پر قبضہ کرلیا ہے، انہوں نے کہا کہ اراضی فراہم کرنے والے شخص کا کہنا ہے کہ انہوں نے زمین اس شرط پر فراہم کی تھی کہ اس میں انہیں چوکیدار کی نوکری دی جائیگی،نوکری نہ ملنے کے بعد انہوں نے زمین واپس لی ہے، ڈپٹی کمشنر نے ایس ڈی او ایجوکیشن سے اس حوالے سے رپورٹ طلب کرلی ہے۔
