کوہاٹ (مانند نیوز)منشیات کی روک تھام کے حوالے سے ڈسٹرکٹ کونسل ہال کے ڈی اے کوہاٹ میں خصوصی آگاہی سیمینار کا انعقاد کیا گیا۔ منعقدہ سیمینار میں ڈیڈک چئیرمین و ایم پی اے کوہاٹ ضیاء اللہ خان بنگش، ڈپٹی کمشنر کوہاٹ فرقان اشرف، ڈسٹرکٹ پولیس آفیسر کوہاٹ شفیع اللہ خان گنڈاپور، ماہرین طب و نفسیات، علماء کرام، دانشوروں اور طلباء و طالبات نے کثیر تعداد میں شرکت کی۔سیمینار سے خطاب کرتے ہوئے ڈیڈک چیئرمین و ایم پی اے ضیاء اللہ خان بنگش کا کہنا تھا کہ منشیات کے استعمال سے انسان مختلف قسم کی ذہنی اور نفسیاتی تناؤ کا شکار ہو جاتا ہے لہذا نشے کی لعنت سے چھٹکارا آگاہی اور مل جل کر کام کرنے سے ممکن ہے۔ انہوں نے کہا کہ منشیات کے تدارک کیلئے جہد مسلسل وقت کی اہم ضرورت ہے۔مقررین نے اس بات پر زور دیا کہ منشیات کی روک تھام اور نفسیاتی مسائل کے حل کیلئے اسلامی تعلیمات سے رہنمائی لی جائے تو کوئی وجہ نہیں کہ ایک صحت مند اور پرامن معاشرے کی تشکیل کا خواب شرمندہ تعبیر نہ ہو اور امن و محبت اور رواداری کی فضاء پروان نہ چڑھے۔