پشاور،سینئرقانون دان، سابق صدر سپریم کورٹ بار ایسوسی ایشن عبدالطیف آفریدی قاتلانہ حملے میں جاں بحق

پشاور(مانند نیوز ڈیسک)سینئرقانون دان اور سابق صدر سپریم کورٹ بار ایسوسی ایشن عبدالطیف آفریدی قاتلانہ حملے میں جاں بحق ہوگئے۔پشاورہائیکورٹ کے بار روم میں فائرنگ کے نتیجے میں سینئر قانون دان شدید زخمی ہوگئے جنہیں تشویشناک حالت میں لیڈی ریڈنگ ہسپتال منتقل کیا گیاجہاں ہسپتال انتظامیہ نے ان کے جاں بحق ہونے کی تصدیق کردی۔پولیس نے ملزم کو گرفتار کر لیا جبکہ خیبر پختونخوا بار کونسل نے لطیف آفریدی پر فائرنگ کے واقعہ کی شدید مذمت کرتے ہوئے  صوبے بھر میں ہڑتال اور تین روزہ سوگ کا اعلان کردیا۔ تفصیلات کے مطابق پشاور میں سینئر وکیل عبدالطیف آفریدی قاتلانہ حملے میں جاں بحق ہوگئے۔پولیس کے مطابق عبدالطیف آفریدی پر پشاور ہائیکورٹ کی حدود میں فائرنگ کی گئی جبکہ لیڈی ریڈنگ ہسپتال انتظامیہ نے سابق صدر سپریم کورٹ بار ایسوسی ایشن عبدالطیف آفریدی کے فائرنگ سے جاں بحق ہونے کی تصدیق کی۔پولیس کے مطابق لطیف آفریدی کو 6 گولیاں لگی تھیں جبکہ لطیف آفریدی پر فائرنگ کرنے والے شخص کو موقع پر گرفتار کرلیا گیا ہے۔  پولیس کے مطابق فائرنگ کرنے والے کی شناخت عدنان کے نام ہوئی ہے جو سائل کی حیثیت سے ہائیکورٹ میں داخل ہوا۔ ایس ایس پی آپریشنز کاشف آفتاب عباسی نے کہا کہ ملزم سے شناختی کارڈ اور لاء کالج کا کارڈ بھی برآمد ہوا ہے جبکہ ایس پی کینٹ محمد اظہر نے لطیف آفریدی پر فائرنگ ذاتی دشمنی کا شاخسانہ قرار دیا ہے۔محمد اظہر نے کہا کہ لطیف آفریدی ایڈوکیٹ پر سیشن جج آفتاب اقبال اور ان کے خاندان کے 3 افرادکے قتل کا الزام تھا اور ملزم انسداد دہشت گردی کے مقتول جج آفتاب آفریدی کا بھانجا ہے۔ترجمان ایل آر ایچ محمد عاصم کے مطابق سینئرقانون دان عبدالطیف آفریدی کو مردہ حالت میں ہسپتال لایا گیااور لطیف آفریدی کو متعدد گولیاں لگی تھیں۔واضح ر ہے کہ معروف قانون دان لطیف آفریدی سپریم کورٹ بار ایسوسی ایشن کے صدر بھی رہ چکے تھے۔دوسری جانب خیبر پختونخوا بار کونسل نے سینئر قانون دان لطیف آفریدی پر فائرنگ کے واقعہ کی شدید مذمت کرتے ہوئے آج صوبے بھر میں ہڑتال اور تین روزہ سوگ کا اعلان کر دیا ہے اور بار کونسل کی جانب سے قتل کے واقعہ کی مذمت کرتے ہوئے کہا گیا ہے کہ معاملے کی فوری تحقیقات کرکے ذمے داروں کو قرار واقعی سزا دی جائے۔