واشنگٹن(مانندنیوز)امریکہ کے محکمہ خارجہ کے ترجمان ویدنت پٹیل نے کہا کہ پاکستان میں ہمارا کوئی پسندیدہ امیدوار یا جماعت نہیں، پاکستان کے حالات کی نگرانی کر رہے ہیں،مضبوط جمہوری پاکستان امریکا کے مفاد میں ہے۔ پریس بریفنگ کرتے ہوئے ترجمان محکمہ خارجہ ویدنت پٹیل نے کہا کہ پاکستان میں جمہوری اقدار، اصولوں کی پاسداری اور قانون کا احترام دیکھنا چاہتے ہیں، کئی معاملات پر پاکستان سے بات چیت جاری ہے۔ امریکی محکمہ خارجہ کے ترجمان کا کہنا تھا کہ پہلے کہہ چکے ہیں ہم کسی ایک سیاسی امیدوار یا جماعت پر پوزیشن نہیں رکھتے، پوری دنیا میں جمہوری اقدار کی عزت اور قانون کی حکمرانی کا مطالبہ کرتے ہیں۔ ان کا کہنا تھا کہ پاکستان ہی کیا دنیا کے کسی ملک میں ہمارا کوئی پسندیدہ امیدوار یا پسندیدہ جماعت نہیں ہے، آزاد میڈیا بہتر جمہوری معاشرہ تشکیل دیتا ہے۔