پشاور(مانند نیوز )غیر سرکاری تنظیم ہمدرد مہربان آرگنائزیشن مردان نے غریب اور مستحق افراد کو اپنے پاؤں پر کھڑا کرنے کے لئے خود کفالت پروگرام کا آغاز کردیا ہے،اس حوالے سے ہمدرد مہربان آرگنائزیشن مردان کے چئیر مین گل وہاب صدیقی اور وائس چئیر مین سیار احمد ہمدرد کا کہنا ہے کہ ہم نے اپنی تنظیم کے تحت کئی اہم معاشی منصوبے ترتیب دیئے ہیں، چند ہزار روپے کی بنیادی سرمایہ کاری سے شروع کئے گئے یہ پروجیکٹس ضلع مردان میں جاری ہیں۔ خودکفالت پروگرام تو اپنی طرز کا بہترین منصوبہ ثابت ہورہاہے جس میں مستحق افراد کو اپنی مدد آپ کے تحت چھوٹے موٹے کاروبار کی طرف راغب کیا جا رہا ہے۔انہوں نے کہا کہ ہمارا مقصدمستحقین کو باعزت روزگار اور غربت سے نجات کے مواقع فراہم کرنا ہے تاکہ وہ نہ صرف خود ایک خوشحال زندگی گزار سکیں بلکہ دوسروں کیلئے بھی روزگار کے مواقع پیدا کر سکیں۔ہمدرد مہربان آرگنائزیشن کا مشن معاشرے سے بے بسی و لاچاری اور بے روزگاری کا خاتمہ اور غریب لاچار مردوں اور عورتوں کے ساتھ ساتھ بچوں اور بچیوں کے روشن مستقبل کیلئے ان کی تعلیم و تربیت اور صحت مند معاشرہ کا قیام ہے۔