کوہاٹ (مانند نیوز )ڈپٹی کمشنر کوہاٹ ڈاکٹر عظمت اللہ وزیر نے محکمہ خوراک اور دیگر متعلقہ اداروں کو ہدایت کی ہے کہ حکومت خیبرپختونخوا کی پالیسی کے مطابق گندم کی خریداری بلاتاخیر شروع کی جائے اور اس میں شفافیت یقینی بنائی جائے۔یہ ہدایات انہوں نے اپنے دفتر میں گندم کی خریداری سے متعلق منعقدہ اجلاس کی صدارت کرتے ہوئے دیں۔اجلاس میں ضلعی انتظامیہ، خوراک، زراعت اور دیگر متعلقہ محکموں کے حکام نے شرکت کی۔ ڈپٹی کمشنر کوہاٹ نے کہا کہ گندم کی خریداری میں صوبائی حکومت کی پالیسی پر من و عن عملدرآمد یقینی بنائی جائے اور خریداری کے عمل کو شفاف اور آسان بنایا جائے۔اسی طرح کسانوں کے مفاد کو بھی مد نظر رکھا جائے۔ڈپٹی کمشنر نے کہا کہ محکمہ خوراک اور دیگر متعلقہ محکمے باہمی رابطے میں رہیں اور تعاون کا مظاہرہ کریں۔انہوں نے خریدے گئے گندم کا ذخیرہ محفوظ کرنے کی بھی ہدایت کی۔