وانا (مانند نیوز) پاکستان پیپلز پارٹی نیبرہوڈ کونسل کاریز کوٹ گنگی خیل کے چیئرمین وارے خان وزیر نے بیان جاری کرتے ہوئے کہا کہ جنوبی وزیرستان لوئر میں پاکستان تحریک انصاف کے نو منتخب نمائندگان نے میرٹ کی دھجیاں بکھیر کر رکھ دی ہیں۔ ذرائع کے مطابق، جماعت کے کارکنان کو کلاس فور کی ملازمتوں میں بے جا ترجیح دی گئی، جس کے نتیجے میں مستحق افراد کو نظرانداز کر دیا گیا۔ ان ملازمتوں کی تعداد 49 بتائی جا رہی ہے، جو مختلف سرکاری محکموں میں سیاسی اثرو رسوخ کے ذریعے تقسیم کی گئیں۔ یہ بات قابل ذکر ہے کہ جنوبی وزیرستان لوئر میں 49 ویلیج کونسل اور نیبرہوڈ کونسلز موجود ہیں، جنہیں ان ملازمتوں میں مساوی حصہ دیا جانا چاہیے تھا۔ تاہم، شفافیت کو پس پشت ڈال کر، ان کونسلز کے حق سے انحراف کیا گیا۔ انہوں نے اس عمل پر شدید تحفظات کا اظہار کرتے ہوئے کہا ہے کہ نوکریوں کی تقرری میں میرٹ کی کھلم کھلا خلاف ورزی کی گئی ہے۔ ان کا کہنا ہے کہ ایسی بے ضابطگیاں نہ صرف عوامی اعتماد کو مجروح کرتی ہیں بلکہ علاقے میں بدانتظامی کے فروغ کا باعث بھی بنتی ہیں۔ اس کے برعکس، عوام کا مطالبہ ہے کہ ان تمام تقرریوں کا غیر جانبدارانہ جائزہ لیا جائے اور ان کا حق مستحق افراد کو فراہم کیا جائے۔