پشاور(مانند نیوز) فریش واٹر ایکشن نیٹ ورک ساؤتھ ایشیا کے پروجیکٹ رائزنگ فار رائٹس فار سٹی وائیڈ انکلوزیو سینی ٹیشن (سی ڈبلیو آئی ایس) کے تحت مردان میں کمیونٹی بیسڈ مانیٹرنگ ورکشاپ کا کامیاب انعقاد کیا گیا۔اس ورکشاپ میں سول سوسائٹی آرگنائزیشنز، کمیونٹی بیسڈ اداروں، واش نیٹ ورک، سی ڈبلیو آئی ایس ٹاسک ٹیم، اور نوجوان رہنماؤں نے بھرپور شرکت کی۔ مقصد یہ تھا کہ شہر میں جامع اور مساوی صفائی کی خدمات کو یقینی بنانے کے لیے مقامی سطح پر نگرانی، احتساب اور وکالت کے عمل کو مؤثر بنایا جا سکے۔شرکاء کو عملی ٹولز اور طریقہ کار سے روشناس کرایا گیا جن کی مدد سے وہ صفائی کے نظام میں موجود خلا کی نشاندہی، دستاویزی ترتیب، اور پائیدار تبدیلی کے لیے اسٹیک ہولڈرز کے ساتھ اشتراک کرسکیں۔ورکشاپ سے خطاب کرتے ہوئے ایگزیکٹو ڈائریکٹر آئی آر ایس پی سید شاہ ناصر نے کہا کہ سی ڈبلیو آئی ایس صرف انفراسٹرکچر نہیں بلکہ وقار، مساوات اور حقوق پر مبنی رسائی کو یقینی بنانے کا نام ہے، خاص طور پر پسماندہ اور کمزور طبقات کے لیے۔انہوں نے اس بات پر زور دیا کہ صفائی کے نظام میں جدت اور احتساب لانے کے لیے نوجوانوں کی شمولیت ناگزیر ہے۔یہ اقدام فانسا کے علاقائی عزم کا حصہ ہے جس کا مقصد مقامی گروپس کو بااختیار بنانا، حقوق پر مبنی نقطہ نظر کو فروغ دینا اور صحت مند معاشرے کی تشکیل کے لیے صفائی کے محفوظ انتظام کو یقینی بنانا ہے۔ورکشاپ کے اختتام پر شرکاء نے سی ڈبلیو آئی ایس کے اصولوں اور پاکستان کے قومی واش وعدوں کے مطابق مشترکہ نگرانی اور وکالت کا طریقہ کار وضع کرنے پر اتفاق کیا۔